គណៈកម្មាធិការ​ជាតិ​ប៉ា​រ៉ា​ឡាំ​ពិ​ក​កម្ពុជា​រៃអង្គាស​ថវិកា​ដើម្បី​សង់​អគារ​ស្នាក់នៅ​របស់​ជន​ពិការ​

443

ដើម្បី​សម្រួល​ដល់​អត្ត​ព​លិ​ក​ជន​ពិការ និង​ជន​ពិការ​ទូទៅ​ ដែល​បាន​ទទួល​អាហារូបករណ៍​សម្ដេច​តេ​ជោ មក​រស់នៅ​ក្រុងភ្នំពេញដែល​ពុំ​មាន​កន្លែង​ស្នាក់នៅ គណៈកម្មាធិការ​ជាតិ​ប៉ា​រ៉ា​ឡាំ​ពិ​ក​កម្ពុជា និង​មជ្ឈ​មណ្ឌល​ជាតិ​នៃ​ជន​ពិការ​តេ​ជោ​សែន បាន​ចាប់ផ្ដើម​ធ្វើការ​រៃអង្គាសជា​ថវិកា និង​សម្ភារៈ ដើម្បី​សាងសង់​អគារ​ស្នាក់នៅរបស់​ជនពិការគម្រោង ​៥០​បន្ទប់​។ នេះ​បើ​តាម​សេចក្តី​ប្រកាស​ របស់គណៈកម្មាធិការ​ជាតិ​ប៉ា​រ៉ា​ឡាំ​ពិ​ក​កម្ពុជាកាលពី​ថ្មីៗ​។

ក្នុង​សេចក្តី​ប្រកាស​បាន​ឲ្យ​ដឹង​ថា ការចូលរួម​របស់​ទ្រង់ សម្ដេច ឯកឧត្ដម លោកជំទាវ លោក លោកស្រី អ្នក​នាង​​កញ្ញា ជា​ការ​រួមចំណែក​ផ្ដល់​ភាព​កក់ក្ដៅ​ ដល់​បងប្អូន​ជន​ពិការ​ដែល​មាន​ការ​លំបាក និង​ជា​ការ​វិនិយោគ​សម្រាប់​និរន្តរភាព ក្នុង​ការ​កសាង​ធនធាន​ប្រកបដោយ​សក្ដានុពល​ រប​ស់​ជន​ពិការ​យើង​នៅ​ទូទាំង​ប្រទេស ក្នុង​បំណង​ជួយ​ដល់​បងប្អូនមានការ​ងារ​ធ្វើ មាន​ចំណូល​ជួយ​ខ្លួនឯង និង​ជួយ​គ្រួសារ​។​ ពិសេស​តាមរយៈ​ការងារ​ជា​សប្បុរស​ បាន​ផ្ដល់​នូវ​កុសល​ថ្លៃថ្លា​សម្រាប់ទ្រង់ ​សម្ដេច ឯកឧត្ដម លោកជំទាវ លោក លោកស្រី អ្នកនាង​កញ្ញា​ក្នុង​ជាតិ​នេះ និង​ទៅ​ជាតិ​ក្រោយៗ​ទៀត ហើយ​ចាត់ទុកថា ​បាន​ចូល​រួម​ចំណែក​កសាង​សង្គម​ខ្មែរ​យើង ​ក្នុង​លក្ខណៈ​គ្រួសារ​តែមួយ​។

ចំពោះ​ទូរស័ព្ទ​ទំនាក់ទំនងរបស់​គណៈកម្មាធិការ​រៃអង្គាស​មាន​៖ ឯកឧត្ដម យី វាសនា ០១៦ ៨៨០ ៣៥៤, លោក យី សុភ​ក្តា ០៩៨ ៧៤៧ ១២៣, ​លោក ម៉ៅ សុជា ០១៦ ៦៦៦ ៨០៨, លោកស្រី សុង សុខលាភ ០១៥ ៩០១ ៥៤០ ​ឬ​អញ្ជើញ​ទៅ​ផ្ទាល់​ដល់​ការិយាល័យនៅភូមិ​ត្រពាំង​ស្វាយ សង្កាត់​ភ្នំពេញ​ថ្មី ខណ្ឌ​សែន​សុខ រាជធានី​ភ្នំពេញ​៕

ប្រភព៖ Bayon TV